Luke 15

1Niya ette heduduhak ho musuru iko hilak heyak ŋafanu to Yesu hetirari to honyie. 2Ette Farisei daŋ ho hegiorok hiŋuŋunita to kwaite innohose eijo, “Elilloŋu tihoni heyak, adaha daŋ hosie.”

3Ette Yesu hiro hitiriami inna dohosie, eijo, 4“Lari lobo lahatai lowuon ho kioro hisihai nobotie ette nobotie lite to tim, obe iso inyeja ebusak nuhe tomona hotoŋuan hohotoŋuan ohu asiahari lie lololita many orrumuni inyeja? 5Larrumu inyeja lie lafa Lolita, olorok inyeja inyie do loho ette munoi.

6Leba inyeja da haji honyie, elilloŋu ifa inyie motiarak ojo Lenyihari honyie daŋ anaboite, eijo, ‘Illa hotomunoi nyo arrumu naŋ ker hanaŋ lafa Lolita.‘ 7Ajo naŋ da hahatai, iyane obolo iso mune te ido heyani lie lobotie lelebusak hiyette innohonyie.

8Kuya nobo hitonoŋoruo no lowuon iko arobiya tomon, hati letilitek inyie rial lobotie, obe iso etuwulek lomo ette hifie haji,ehum riŋa binno many orrumuniŋ? 9Hati larrumu inyie, ette hililloŋ motiarak honyie daŋ, ho Lenyihari, ette hijo, ‘Itumunoi ho naŋ, nyo laŋarrumu naŋ rial lafa etilitek naŋ.’ 10Ara iso daŋ ane, ajo naŋ da hatai, owuon mune do hosiere ho anjillohien illo Hollum lebusak heyani hiyette innohonyie.”

11Ette Yesu hijo, “Owuon ifa lobo tihoni ho lenyirok honyie lohorik, 12Ette hito lettiŋ tere hose hijo do monye, ‘Baba, isiara da hanaŋ iyane ibariti inna lara orutat inhanaŋ.’ Ette inyeja abuanyak do hose ibariti hose.

13Da halu ho holoŋitek kai, adumu hito lie hirro innohonyie daŋ ette ŋalotohini eno a doŋe nalama binno, de ette hitihar arobiya he ibariti innafa honyie daŋ te imanyiti inno lorru. 14Niya, nafa esahak inyeja ibariti innafa daŋ, awoŋ hiŋa nolorru to doŋe nyia, ette inyeja hillociaŋ binno.

15Eno inyeja do lobo tihoni egiamari lo doŋe nyie. Ette efahak inyeja amana honyie leribitari betteha. 16Adaya ifa inyeja daha no habohol inno morro innafa adaha betteha nyo obe ifa lobo tihoni eis inyeja nobo daha.

17Hati nafa egigillo inyie to kwan honyie, ette hijo, ‘Hara huwo hegiamak jai da haŋ ho monye hanaŋ illa ladaha ŋiria nettok many ofitok ajo naŋ hiŋa otohoi! 18Ahu naŋ ebusak mai inna ette naŋ eno do monye hanaŋ, ajo iso naŋ ahu hijo do honyie, “Baba, eyau naŋ do hosiere he ido, ho do hosiere hoi. 19Abe naŋ asiru helilloŋori a lenyi hoi; hati ehumak naŋ ahegiamani lohoi.‘“

20Nia, odiote loŋeye le odule ŋawoŋ many do monye. Nafa halalama inyeja, egonyu monye inyeja ette diote ho hamehini honyie, enyor ohu heniafahini kwaite ho inyeja ette hihut yohe. 21Ette inyie hijo do monye, ‘Baba, eyau naŋ do hosiere he ido ojo do hosiere hoi. Abe iso naŋ lenyak asiru helilloŋori alenyi hoi, hati ihumak naŋ ahegiamani lohoi.‘

22Hati eijo monye do hegiamaki honyie, ‘Kuak yani boŋojin inno olibo iticofok do honyie, ehumak bilette to hafialai honyie iko hamuha do hejek honyie. 23Tia, iyani tauwo buruŋhati isiahak do honyie hettedahai huwo lohomo nohonyie. 24Nyo oye ifa lenyi hanaŋ, hati owuaran inyeja iyane. Olita ifa inyeja, hati arrumuni inyeja iyane.‘Ette isieja daŋ hitihabuo ojo daŋ adaha.

25Hati owuon ifa lenyi honyie ille hittok ta mana. Nafa eliaha inyeja aŋhati ha haŋ, etiru inyeja hidolo ojo hififoho. 26Ette inyeja hililloŋ lobo hegiamani ette hifi hijo, howuon nyo. 27Ette hegiamani hijo do honyie, ‘Ottu ida ilasi hoi ahaŋ inyeja ne odumu monyehoi hiteŋ lolofir binno ette ŋesiahak to honyie, nyo acohini inyeja nalanyar.’

28Ejoria ifa ilasi letok, ette hibo eno ahotuai haŋ. Ojo monye ette ŋawoŋ abali, lettenari inyeja. 29Hati ette lenyi letok hitiraŋ do monye hijo, ‘Toriŋai ŋasi hunna arria inne lepitori naŋ do hoi, abe naŋ amiasa hifahita innohi, ojo iye hati ebe eiso naŋ lobo buruŋhati lo hinne hijo anyar naŋ ehumak lohomo to morot illalaŋ, 30hati awoŋ lieny hoi leletihara ibariti hoi do somok, ette iye esiahak do honyie tauwo lolofir.‘

31 Eijo monye do honyie, ‘Lenyi hanaŋ, adule naŋ iko hoi holoŋi daŋ, hati ara innanag daŋ innohoi. Hati osiru dohooi hehumahini lohomo ette mune, nyo ilasi lohoi le, oye ifa; ojo iyane owuaran, olite ifa inyeja ojo iyane arrumuni.‘“

32